Хүүхдийн хувцасны загварын чиг хандлагыг тодорхойлох, хувцас загвар, гоо зүйн мэдлэг олгох зорилготой Wonder baby Mongolia 2016 загварын шоу ням гарагт амжилттай зохион байгуулагдлаа. Анхан шатны шалгаруулалтанд 60 гаруй хүүхэд бүртгүүлж, тусгай хөтөлбөрийн дагуу сургалтанд хамрагдаж шилдэг 33 оролцогчийг шалгаруулж шоунд оруулжээ. Гоёлын хувцас, чөлөөт  хувцас, үндэсний хувцас гэсэн гурван хэсгээс бүрдсэн тус загварын шоуны үеэр Herakings брэнд, Азийн модель агентлагийн загваруудыг бяцхан загвар өмсөгчид амилууллаа. Мөн МХО-ны Авъяас хамтлаг, Лоолойгийн найзууд нэвтрүүлгийн авъяаслаг багачууд найзууддаа урлагийн тоглолтоор бэлэг барьлаа. Шоуны зохион байгуулагчаар Азийн модель агентлаг, Fashion TV, SBN телевиз хамтран ажиллажээ. Энэ шоу нь монголд анх удаа зохиогдож байгаа хүүхдийн шоу гэдгээрээ онцлогтой. Тэмцээний шилдэг найман оролцогч Wonder baby Shanghai 2016 олон улсын загварын долоо хоногт оролцох эрхтэй болсон.