170 гаруй жилийн түүхтэй Deloitte Consulting компанид програмистаар Монгол залуу ажилладаг. Гоцбаярын Батжин  нь IT-гийн чиглэлээр дэлхийн шилдэг 10 их сургуулийн нэгд багтдаг Мьюнхен хотын Технологийн их сургуулийг эдийн засгийг компьютер технологитой хослуулсан мэргэжлээр төгссөн бөгөөд өдгөө Deloitte Consulting компанийн нэрийн өмнөөс томоохон бизнес эрхлэгчдэд бизнес стратегийн зөвлөгөө өгдөг байна.

Мөн дэлхийд алдартай Apple, Тесла зэрэг компаниудын бүтээгдэхүүнийг бизнест хэрхэн амжилттай ашиглах, бүтээгдэхүүнээ хэрхэн борлуулахад нь туслаж хэдэн тэрбумын төслүүд дээр ажилладаг аж. Г.Батжин Монголд дунд сургуульд сурч байхдаа найзуудтайгаа нийлж вэб хөгжүүлдэг компани байгуулж, томоохон компаниудад вэб хийж өгдөг байжээ.