Нийслэлчүүд бямба гарагийн амралтаа Үндэсний цэцэрлэгт хүрээлэнд өнгөрүүллээ. НЗДТГ, НАЖГ-аас жил бүр зохион байгуулдаг “Улаанбаатарын өвлийн наадам” гэр бүлийн баяр энэ жил урд өмнөх жилүүдээс ч өргөн хүрээтэй боллоо. Тэмцээний хамгийн өндөр шагналтай үндэсний хувцастай шилдэг оролцогчид эхэнд тодорсон бол гэр бүлийн буухиа , цасан урлал, мөсөн сур болон мөсөн шагай сонирхогчдын тэмцээн ар араасаа үргэлжилсэн. Мөсөн сурын УАШТ, Регбийн Улаанбаатарын цомын АШТ гэсэн өргөн цар хүрээтэй тэмцээнүүдээс гадна онц сонирхолтой мотоциклийн үзүүлбэр, нохой чарга, өвлийн дугуйн үйлчилгээ, аялалын хувцас, эдлэлийн худалдаа, мини-амьтны хүрээлэн гээд нүд хужирлах үзэж сонирхох зүйлс олон байлаа. Айсуй хаврын баярыг мэдрүүлсэн  энэ өдөр цаг агаар ч дулаан байсан тул Улаанбаатар чуулгын урлагийн тоглолтыг ч нийслэлчүүд тухлан үзсэн юм.