Сэлэнгэ аймгийн Сүхбаатар хотод Ази тивийн хошой аварга, гавьяат дасгалжуулагч Х.Алтанхуягийн нэрэмжит боксын залуучуудын улсын аварга шалгаруулах тэмцээний үеэр хүний амь нас хохирсон золгүй явдал болжээ. Хоёр тамирчин рингэнд тулалдсан бөгөөд ялалт авсан Ховд аймгийн боксчин Т нь сандал руу яаран очиж, “Багш аа, миний толгой их өвдөж байна” гэж хэлэнгүүтээ ухаан алдсан байна. Улмаар Сэлэнгэ аймгийн нэгдсэн эмнэлгээс ухаан алдсан хүүд яаралтай арга хэмжээ авч, сэхээний тасагтаа 5-6 цаг эмчилгээ хийсэн аж. Ингээд нийслэлд авчирч Гэмтлийн эмнэлэгт хүргэсэн ч найм хоноод нас барсан байна.